జనాలతో కలవాలని ఉంటుంది.. కానీ నాకు ఆ స్కిల్స్ లేవు: అక్షయ్

బాలీవుడ్ విలక్షణ నటుడు అక్షయ్ ఖన్నా ప్రతిభావంతుడిగా గుర్తింపు పొందినప్పటికీ, వ్యక్తిగత జీవితంలో మాత్రం అందరికీ దూరంగా, ఒంటరిగా ఉంటాడనే అభిప్రాయం ఉంది. ఆయన సోషల్ మీడియాలో చురుగ్గా ఉండడు, అలాగే సినిమా ప్రమోషన్లలో కూడా అరుదుగా కనిపిస్తాడు. అయితే, తాను కావాలని అంతర్ముఖుడిగా (ఇంట్రావర్ట్) ఉండనని, ఒక రకమైన ఇబ్బందికర పరిస్థితుల వల్లే అలా ప్రవర్తిస్తానని గతంలో అక్షయ్ ఖన్నా వెల్లడించిన విషయాలు ప్రస్తుతం మళ్లీ చర్చనీయాంశమయ్యాయి.

కొన్నేళ్ల క్రితం సిమి గరేవాల్ నిర్వహించిన 'రొండేవు విత్ సిమి గరేవాల్' టాక్ షోలో అక్షయ్ ఈ ఆసక్తికర అంశాలను పంచుకున్నాడు. "మీ చుట్టూ మీరే గోడలు నిర్మించుకుంటారు, తద్వారా జనాన్ని దూరంగా ఉంచుతారు" అని సిమి గరేవాల్ వ్యాఖ్యానించగా.. "ప్రస్తుతం ఆ గోడలు కాస్త పారదర్శకంగా మారేలా చేయగలుగుతున్నాను, కానీ అవి ఇంకా పూర్తిగా తొలగిపోలేదు" అని అక్షయ్ సమాధానమిచ్చాడు. తాను అత్యంత సున్నితమైన మనస్తత్వం కలిగిన వ్యక్తినని, ఆత్మీయుల విషయంలో చిన్న అపశ్రుతి చోటుచేసుకున్నా భరించలేనని పేర్కొన్నాడు.

తాను ఇతరులను బాధపెట్టకూడదని ఎప్పుడూ జాగ్రత్తపడతానని, పొరపాటున తన వల్ల ఎవరైనా నొచ్చుకుంటే వెంటనే పశ్చాత్తాపం చెంది క్షమాపణ కోరుతానని ఆయన చెప్పాడు. "క్షమించమని కోరడం చాలా సులభమైన విషయం. అది ఎంతో స్వేచ్ఛను ప్రసాదిస్తుంది" అని ఆయన వ్యాఖ్యానించాడు.

తన స్వభావం గురించి అక్షయ్ మరింత స్పష్టతనిస్తూ.. "నాకు కొత్త వ్యక్తులను కలవాలని, వారి గురించి తెలుసుకోవాలని ఉంటుంది. అయితే, ఇతరులతో సంభాషించడానికి అవసరమైన నైపుణ్యాలు నా వద్ద లేవనేది వాస్తవం. ఎవరితోనైనా కలవడం ఇష్టం లేకపోవడానికి, కలవలేకపోవడానికి మధ్య చాలా వ్యత్యాసం ఉంది" అని వివరించాడు.